„სადაც ვიყავი - ეს იყო სპორტი თუ ენერგეტიკა, საარჩევნო კამპანიის დროსაც კი, არასდროს დამიყენებია წინ საკუთარი „მე", ყოველთვის ვამბობდი „ჩვენ", - ამის შესახებ თბილისის ახალმა მერმა კახა კალაძემ დავით ნარმანიას საქმიანობის შემაჯამებელ ღონისძიებაზე სიტყვით გამოსვლისას განაცხადა.

მისი თქმით, საზოგადოებაში არსებული სტერეოტიპი უნდა შეიცვალოს და თბილისის განვითარება საზოგადოების საერთო ძალისხმევით  უნდა მოხდეს.

„მინდა, გარკვეული სტერეოტიპები შევცვალოთ. არსებობს განწყობა - აი, ჩვენ ავირჩიეთ და ისინი გააკეთებენ. რა თქმა უნდა, ჩვენ გვაქვს უდიდესი პასუხისმგებლობა იმაში, რომ ის პროექტები, რომელიც ჩვენი მხრიდან იყო დასახელებული, ის პრობლემები, რომლებიც დღეს თბილისისა და   თბილისელებისთვის აქტუალურია, მოგვარდეს. ამას კომპლექსური მიდგომა სჭირდება და ჩვენ, ჩვენი გუნდით მზად ვართ ამისთვის. მზად ვართ, შევეჭიდოთ იმ გამოწვევებსა და პრობლემებს, რომელიც დღეს დედაქალაქს აწუხებს. მინდა, ვთხოვო ჩვენი ქალაქის მოსახლეობას, რომ ისინი ქალაქის წინსვლასა და განვითარებაში აქტიურად იყვნენ ჩართული", - აღნიშნა კახა კალაძემ.

დედაქალაქის ახალი მერის განცხადებით, მოსახლეობამ უნდა განსაზღვროს, თუ რომელი პროექტი უნდა იყოს მათთვის პრიორიტეტული.

„ამის პლატფორმებს ჩვენ შევქმნით. ჩვენ მზად ვართ ამისთვის, რომ მათი ჩართულობა იყოს შესაძლებელი სხვადასხვა მიმართულებით. თუნდაც, კონტროლი, თუნდაც პროექტების განხორციელება - მათ გადაწყვიტონ საკუთარ უბანში რომელი კონკრეტული პროექტი უნდა იყოს პრიორიტეტული და რომელი უნდა განხორციელდეს პირველი. დარწმუნებული ვარ, რომ ასეთი მიდგომით თბილისი ძალიან მალე იქნება სიცოცხლით სავსე ქალაქი და ბოლოს იმას კი არ იტყვიან, რომ ეს მერიამ და კალაძემ გააკეთა, არამედ იტყვიან - ეს ჩვენ ერთად გავაკეთეთ", - აღნიშნა კახა კალაძემ.