logo_geo
ირაკლი ღარიბაშვილი საგამოძიებო სამსახურისა და პერსონალურ მონაცემთა დაცვის სამსახურის უფროსების თანამდებობებზე შესარჩევად პარლამენტს ორ-ორ კანდიდატს წარუდგენს
- +

24 იანვარი. 2022. 10:36

 

საქართველოს პრემიერ-მინისტრი ირაკლი ღარიბაშვილი პარლამენტს საგამოძიებო სამსახურის უფროსისა და პერსონალურ მონაცემთა დაცვის სამსახურის უფროსის თანამდებობებზე შესარჩევად ორ-ორ კანდიდატს წარუდგენს.

 

ამის შესახებ მან მთავრობის სხდომის დაწყებამდე განაცხადა. ღარიბაშვილის თქმით, უკვე შედგენილია კანდიდატების შესარჩევი ორივე საკონკურსო კომისია, რომელთა პირველი სხდომები დღეს გაიმართება.

 

„კანონმდებლობაში განხორციელებული ცვლილებების საფუძველზე, სახელმწიფო ინსპექტორის სამსახურის ნაცვლად 1 მარტიდან ორი ახალი უწყება იქმნება: პერსონალური მონაცემების დაცვის სამსახური და სპეციალური საგამოძიებო სამსახური. ამ სამსახურის ხელმძღვანელების შესარჩევად კონკურსები გამოცხადდება. უკვე შედგენილია კანდიდატების შესარჩევი ორივე საკონკურსო კომისია, რომელთა პირველი სხდომები დღეს გაიმართება. კანონმდებლობის შესაბამისად, მასში მუშაობას მეც მივიღებ მონაწილეობას.

 

იმ კრიტერიუმთაგან, რომლითაც კომისიები იხელმძღვანელებენ, მნიშვნელოვანია მართლმსაჯულების ან სამართალდამცავი ორგანოების ან ადამიანის უფლებათა დაცვის სფეროში მუშაობის არანაკლებ 5 წლის გამოცდილება.

 

რაც შეეხება ეტაპებს, კონკურსის შედეგად თითოეულ თანამდებობაზე შეირჩევა არა ნაკლებ 2 და არაუმეტეს 5 კანდიდატი. ჩემთვის წარმოდგენილი კანდიდატებიდან საქართველოს პარლამენტს წარვუდგენ 2 კანდიდატურას სპეციალური საგამოძიებო სამსახურის უფროსის თანამდებობაზე შესარჩევად და ასევე ორ კანდიდატს პერსონალურ მონაცემთა დაცვის სამსახურის უფროსის თანამდებობაზე ასარჩევად“, - განაცხადა ირაკლი ღარიბაშვილმა.

 

 

big_banner
არქივი