ვიყოთ ოპტიმისტები. დღევანდელ შეხვედრას ჩვენ შეგვიძლია დავარქვათ სახელი, რომ ეს იყო შეხვედრა, სადაც ოდნავ წინ წავიწიეთ. იქიდან გამომდინარე, რომ საერთო პრინციპებზე და კონსულტაციების გაგრძელებაზე შევთანხმდით, - ასე უპასუხა ,,ქართული ოცნების’’ აღმასრულებელმა მდივანმა მამუკა მდინარაძემ ჟურნალისტების შეკითხვას სახალხო დამცველის არჩევასთან დაკავშირებით.

როგორც მდინარაძემ აღნიშნა, არის თეორიული პატარა შანსი, რომ მხარეები ერთიანი კანდიდატის არჩევაზე შეთანხმდნენ. მან შეხვედრას სახალხო დამცველის არჩევასთან დაკავშირებით ოპტიმისტური უწოდა.

,,დღეს ულტიმატუმების ენაზე საუბარი ნამდვილად არ ყოფილა და ასევე შემიძლია გითხრათ, რომ იყო საუბარი, თუ ვის აქვს თეორიული შანსი. დღეს არ გვქონდა ილუზია, რომ რომელიმე ერთ კანდიდატზე შევთანხმდებოდით. პოზიტიურ კონტექსტში შეიძლება ბევრი ვილაპარაკეთ, რომ კარგია ეს და რატომ არის კარგი, მაგრამ რომელიმე კონკრეტულ კანდიდატზე კონცენტრირება არც მიცდია მე თვითონაც. იქიდან გამომდინარე, რომ შეუძლებელი იყო ამის ილუზია, თუმცა მეორე მხრივ, ჩვენ პრაქტიკულად შევჯერდით იმ კანდიდატებზე, რომლებსაც თეორიული შანსი არ გააჩნიათ. წრე ამით უფრო ვიწროვდება და შესაბამისად, ყველა შეხვედრაზე 19 და 14 კანდიდატზე არ ვილაპარაკებთ, უფრო ვიწრო წრეზე ვისაუბრებთ. რა თქმა უნდა, არც გვარებზე არ ვისაუბრებთ, ვინც გამოვრიცხეთ იქიდან გამომდინარე, რომ კანდიდატები, რომლებზეც შევთანხმდით, რომ არც ოპოზიცია და არც უმრავლესობა მხარს არ დაუჭერს შემდგომი განხილვის დროს, მაგიდაზე, რომ მათი სახელი და გვარები დავწეროთ, აზრი არ ექნება. ამაზე შევთანხმდით. ამიტომ, წინ წავიწიეთ, ასე დავარქვათ დღევანდელ შეხვედრას. თუმცა, კონკრეტულ კანდიდატზე კონცენტრირება არ ყოფილა. უფრო ვიწრო წრესთან მიმართებით ჩვენ გავაგრძელებთ შემდგომ კონსულტაციებს. ჩვენს გუნდს ორშაბათი დღე გვჭირდება ამისათვის, რომ ტრადიციულად სასესიო კვირაა და უმრავლესობაა სხდომაა, იქ ვისაუბრებთ ჩვენ და შემდეგ კვირაში, ანუ უმრავლესობის სხდომის შემდგომ გავაგრძელებთ კონსულტაციებს და ვიმედოვნებ, რომ გაჩნდა რაღაც პატარა თეორიული შანსი, რომ იქნებ მართლაც შევძლოთ ჩვენ ყველამ ერთად კონცენტრირება ერთ კანდიდატზე“, - განაცხადა მამუკა მდინარაძემ.

ფრაქცია „ქართული ოცნების“ თავმჯდომარემ, მამუკა მდინარაძემ სახალხო დამცველის კანდიდატებზე ოპოზიციასთან კონსულტაციები გამართა. შეხვედრას ბოიკოტი გამოუცხადა „სტრატეგია აღმაშენებელმა“, დანარჩენი საპარლამენტო ოპოზიციური პარტიები კი კონსულტაციებში მონაწილეობდნენ.