logo_geo
დავით მათიკაშვილი: მასშტაბური ინფრასტრუქტურული პროექტები ქვეყნის ეკონომიკურ განვითარებას მნიშვნელოვნად შეცვლის უკეთესობისკენ
- +

29 ნოემბერი. 2022. 15:21

 

 

„ქართველ ხალხს დამოუკიდებლობის მოპოვების შემდეგ იმ მასშტაბის აღმშენებლობა და ორნიშნა ეკონომიკური ზრდა, რასაც ადგილი აქვს დღეს ჩვენს ქვეყანაში,  არ ახსოვს. განვითარება და პროგრესი შეეხო ყველა მიმართულებას, სოფლის მეურნეობიდან დაწყებული ტურიზმის სფეროთი დასრულებული, რაც ქართული ეკონომიკის ერთ-ერთ ფლაგმანს წარმოადგენს და რომელმაც ბოლო რამდენიმე წლის განმავლობაში არნახული წინსვლა განიცადა. გაზრდილი ბიუჯეტიდან კი სოციალური პროექტების დაფინანსებით, ხელფასების, პენსიებისა და დახმარებების ზრდით ქვეყანაში, ჩვენი მოქალაქეების სიღარიბის სტატისტიკური მაჩვენებელი ისტორიულ მინიმუმამდეა შემცირებული, ისევე როგორც ისტორიულ მინიმუმამდეა შემცირებული უმუშევრობის დონე“, - განაცხადა იურიდიულ საკითხთა კომიტეტის თავმჯდომარის პირველმა მოადგილემ დავით მათიკაშვილმა პარლამენტის პლენარულ სხდომაზე.

 

მისი თქმით, მსოფლიო სავალუტო ფონდის პროგნოზის შესაბამისად, ეკონომიკის ზრდის არსებული ტენდენციის შენარჩუნებით,  2027 წლისთვის ერთ სულ მოსახლეზე ქვეყნის შიდა პროდუქტი 10 000 აშშ დოლარს გადააჭარბებს, ხოლო 2030 წლისათვის 15 000 აშშ დოლარს, რაც საქართველოს მაღალ შემოსავლიანი ქვეყნების რიგში გადაიყვანს.

 

დავით მათიკაშვილმა თავის გამოსვლაში ყურადღება  რამდენიმე მასშტაბურ ინფრასტრუქტურულ პროექტზე გაამახვილა, რომლებიც საბოლოოდ მნიშვნელოვნად შეცვლის უკეთესობისკენ ქვეყნის ეკონომიკურ განვითარებას.

 

„2022 წელს, მხოლოდ საქართველოს რეგიონული განვითარებისა და ინფრასტრუქტურის სამინისტროსა და შესაბამისი პროგრამების ფარგლებში, მიმდინარეობდა 5500-მდე პროექტი, სადაც დასაქმებული იყო 25 000-მდე ადამიანი და 1200-მდე კომპანია. მიმდინარეობდა 1100 კმ-მდე საერთაშორისო და შიდასახელმწიფოებრივი გზის რეაბილიტაცია და პერიოდული შეკეთება. 200-ზე მეტ ლოკაციაზე,  ჯამში 3 მილიარდ ლარამდე ღირებულების, წყალმომარაგების და წყალარინების პროექტები განხორციელდა. მხოლოდ მუნიციპალური განვითარების ფონდის მიერ, დასრულდა 42 სკოლის და 9 ბაღის  მშენებლობა-რეაბილიტაცია. ეს ინფრასტრუქტურული პროექტების მხოლოდ მცირე ჩამონათვალია. ქვეყნის წარმატება და მისი მდგრადი ეკონომიკური განვითარება ის მოცემულობაა, რომელსაც მთელი საქართველო, სრულიად პოლიტიკური სპექტრი უნდა მიესალმებოდეს, აღიარებდეს, თანაუგრძნობდეს და მხარში ედგეს ქვეყნის ხელისუფლებას“, - განაცხადა დავით მათიკაშვილმა.

 

 

 

 

big_banner
არქივი