ჩხოროწყუს საკრებულოს დადგენილებით, მუნიციპალიტეტის ტერიტორიაზე მცხოვრებ ნარკოლოგიურ აღრიცხვაზე მყოფ პირებს კატებისა და ძაღლების ყოლის უფლება არა აქვთ, 18 წლამდე არასრულწლოვნებს კი მხოლოდ მშობლების წერილობითი თანხმობით შეუძლიათ.

დადგენილება, რომელიც ჩხოროწყუს ახალი მოწვევის საკრებულომ 2017 წლის 4 დეკემბერს მიიღო, განსაზღვრავს ისეთ რეგულაციებსაც, რომელთა ნორმატიული მოწესრიგება, როგორც წესი, შეუძლებელია ანდა მიზანშეწონილი არ არის. მაგალითად, დადგენილებაში მითითებულია, რომ: ძაღლისა და კატის მეპატრონე არ შეიძლება იყოს ქმედუუნარო პირი; ფიზიკურ პირებს შეუძლიათ ქუჩიდან აიყვანონ, იჩუქონ, ასევე ანდერძით ან მემკვიდრეობით მიიღონ კატა და ძაღლი; მოდარაჯე ძაღლის დაბმა შეიძლება მხოლოდ 5 მეტრიანი ან უფრო მეტი სიგრძის თასმით; მეპატრონე ვალდებულია უზრუნველყოს კატისა და ძაღლის საძილე ადგილის გათბობა და განათება.

როგორც ირკვევა, ეს დადგენილება ჩხოროწყუს საკრებულომ მოქალაქეების მიერ 2017 წლის 5 ოქტომბერს შეტანილი პეტიციის საფუძველზე მიიღო. პეტიციას თან ახლდა დადგენილების პროექტიც, რომელიც საკრებულომ ტექსტის შეუცვლელად დაამტკიცა.

წყარო :