logo_geo
ახმეტა-თელავი-ბაკურციხის საავტომობილო გზის 15,5 კმ-იან მონაკვეთზე სამშენებლო სამუშაო დასკვნით ეტაპზეა
- +

8 ივნისი. 2021. 12:26

 

ახმეტა-თელავი-ბაკურციხის საავტომობილო გზის 15,5 კმ-იან მონაკვეთზე სამშენებლო სამუშაო დასკვნით ეტაპზეა. 13 კმ-იან მონაკვეთზე მშენებლობა უკვე დასრულდა, ხოლო დარჩენილ 2.5 კმ-ზე სახიდე გადასასვლელის, ხელოვნური ნაგებობებისა და ასფლატ-ბეტონის საფარის საფუძვლის მოწყობა მიმდინარეობს, - ამის შესახებ ინფორმაციას საქართველოს რეგიონული განვითარებისა და ინფრასტრუქტურის სამინისტრო ავრცელებს.

 

მათივე ინფორმაციით, შემოვლითი მონაკვეთი შიდასახელმწიფოებრივი მნიშვნელობის ახმეტა-თელავი-ბაკურციხის გზას საერთაშორისო მნიშვნელობის თბილისი-ბაკურციხე-ლაგოდეხის გზასთან დააკავშირებს, რის შემდეგაც ავტოტრანსპორტს, საჭიროების გარეშე, აღარ მოუწევს გავლა ქალაქ გურჯაანსა და გურჯაანის მუნიციპალიტეტის სოფლებში: ბაკურციხე, კოლაგი, ძირკოკი, ჭანდარი, ვეჯინი და ჩუმლაყი

 

პროექტების მონიტორინგის ფარგლებში, სამუშაო პროცესს, რეგიონული განვითარებისა და ინფრასტრუქტურის მინისტრი ირაკლი ქარსელაძე გაეცნო.

 

„უმნიშვნელოვანესი პროექტია, როგორც კახეთის მიმართულების განვითარების, ასევე საგზაო უსაფრთხოებისა და ეკოლოგიური თვალსაზრისით. ივლისში გზა გაიხსნება სრულად, რაც გადაადგილების დროის განახევრებას უზრუნველყოფს. ამას გარდა, კახეთში მნიშვნელოვანი პროექტი გვაქვს ბაკურციხიდან წნორის მიმართულებით. ეს მონაკვეთი მჭიდროდ დასახლებულ ტერიტორიაზე გადის და სატრანზიტო მოძრაობის მაღალი ინტენსივობით გამოირჩევა, რაც გადაადგილების უსაფრთხოების მაღალ სტანდარტს ვერ აკმაყოფილებს. აქ, ორზოლიანი ასფალტ-ბეტონის გზის მეშვეობით, ყველანაირი სტანდარტის გათვალისწინებით მოხდება გადაადგილება და ამასთანავე აქაც განახევრდება გადაადგილების დრო. ეს და სხვა დაგეგმილი პროექტები იქნება ძლიერი მუხტი კახეთის პოტენციალის შემდგომი განვითარებისთვის“, - აღნიშნა ირაკლი ქარსელაძემ

 

უახლოეს პერიოდში ტენდერი გამოცხადდება 35 კმ-მდე საგარეჯო-წნორის გზის მშენებლობაზე. გზის ერთი ნაწილი საერთაშორისო საფინანსო ინსტიტუტის მიერ, ხოლო დანარჩენი - სახელმწიფო ბიუჯეტიდან დაფინანსდება, რაც ქართულ კომპანიებს ტენდერში კონკურენტული მონაწილეობის საშუალებას მისცემს.

 

big_banner
არქივი