ბერძნულ-რომაული სტილით მოჭიდავე თემურ ჭკუასელიძემ (87 კგ) ბელგრადში მიმდინარე მსოფლიოს 23-წლამდელთა ჩემპიონატზე, ზედიზედ სამი შეხვედრა მოიგო, თან, სამივე ვადაზე ადრე და ნახევარფინალში გავიდა.
პირველ წრეში ჭკუასელიძემ სომეხი გევორგ ტადევოსიანი დაამარცხა, ანგარიშით 8:0. შემდეგ, ბულგარელ სვეტოსლავ ნიკოლაევ ნიკოლოვს აჯობა - 10:1. მეოთხედფინალში კი, თურქ მუჰუტდინ სარიჩიჩეკთან ბრძოლა 0:5 დან შეატრიალა სათავისოდ. მეორე პერიოდის დასაწყისში, როდესაც უკვე სამქულიანი უპირატესობით იგებდა (8:5), მეტოქე შებოჭა.
ნახევარფინალური შეხვედრები თბილისის დროით 21:00 საათიდან დაიწყება და ჭკუასელიძე ფინალის საგზურისთვის რუს ალექსანდრ კომაროვს დაუპირისპირდება.
ლერი აბულაძემ (63 კგ) მეორე შეხვედრაში რუსეთის ნაკრების წევრი გიორგი ტიბილოვი დაამარცხა, ანგარიშით 7:3 და ნახევარფინალში გავიდა, სადაც ირანელ ალი რეზა ნეჯატის დაუპირისპირდება. ტიბილოვთან დაჭიდებამდე, აბულაძემ ყაზახ ასუხატ მუხამადიევს მოუგო - 5:1.