logo_geo
ირაკლი იმნაიშვილი: სტიგმის გამო დიდი ხნის განმავლობაში ვდუმდი - 52 ნემსი გავიკეთე, 1 წელი გაგრძელდა...
- +

1 ივნისი. 2021. 00:11

 

 

"რუსთავი 2-ის" აღმასრულებელ დირექტორს ირაკლი იმნაიშვილს 2006 წელს მძიმე დიაგნოზი დაუსვეს. ოჯახის წევრებს უთხრეს, რომ პაციენტს სიცოცხლის 3-დან 6-თვემდე პერიოდი ჰქონდა. მისი თქმით, დიაგნოზი იმ პერიოდში იყო განაჩენი, რადგან მაშინ C ჰეპატიტზე ინფორმაცია არ არსებობდა და დაავადება სტიგმატიზირებული იყო.

 

"სტიგმის გამო დიდი ხნის განმავლობაში ვდუმდი. სინამდვილეში წამალდამოკიდებულები წარმოადგენენ ძალიან მცირე პროცენტს, ადამიანების უმეტესობა უხარისხო სამედიცინო სერვისის გამო დაინფიცირდა. ჩემს შემთხვევაში ეს იყო სტომატოლოგიური კლინიკა. თინეიჯერი ვიყავი მაშინ. ავადმყოფობის სივერაგე იმაში მდგომარეობს, რომ სიმპტომი არ გაქვს. რომ არ დაწყებულიყო რუტინული კვლევა, C ჰეპატიტი განაგრძობდა განვითარებას.

 

52 ნემსი გავიკეთე, 1 წელი გაგრძელდა. ძალიან მძიმე გვერდითი მოვლენები ჰქონდა. ნემსს მოჰყვებოდა თავისი ანოტაცია. იწვევს მძიმე ქიმიურ დეპრესიას, რასაც მოსდევს თვითმკვლელობის მცდელობები, ხოლო შემდეგ აბზაცში წერია, რომ იყო თვითმკვლელობის ფაქტები.

 

ჩავთვალე, რომ მე არ უნდა გამომეყენებინა ანტიდეპრესანტები, რასაც მოჰყვა უმძიმესი ქიმიური დეპრესია, ამ სიმძიმეს თან დაერთო, რომ მე ჩემი ადგილის დამკვიდრებას ვცდილობდი ლონდონში, ერთ ერთი მედიაკომპანიაში.

 

ლონდონში ცხოვრობს ელისაბედ ჩაჩხიანი, რომელმაც შეგვიფარა. მის გარეშე წარმოუდგენელი იქნებოდა ეს ყველაფერი. საუკეთესო სოკოს სუპს აკეთებდა, გემო მქონდა დაკარგული, მახსოვდა მისი გემო. ამ წვნიანის ჭამის დროს ვნახე, როგორ დამეწყო თმის ცვენა. სხვები უფრო ისტრესებოდნენ, ვიდრე მე. 52 ნემსით მკურნალობა დასრულდა 0 შედეგით. მიხარია, რომ იმ პრეპარატით მკურნალობა, რომელიც დღეს საქართველოშია შემოსული, საუკეთესოა, რაც კი მსოფლიოში არსებობს,"- ჰყვება ჟურნალისტი გადაცემა „ფარულ კონვერტში“

 

მას შემდეგ, რაც C ჰეპატიტთან ბრძოლა დაასრულა, ირაკლი იმნაიშვილს კიდევ ერთი სერიოზული პრობლემა შეექმნა - როგორც გადაცემაში იხსენებს, პირის ღრუში, ენის ქვეშ კანზე გაუჩნდა პრობლემა. ქირურგმა დიაგნოზი მალევე უთხრა - სიმსივნე.

ვინდაიდან  სიმსივნე პირის ღრუში იყო, ქირურგმა პაციენტი გააფრთხილა, რომ შესაძლებელია, დარჩენოდა მეტყველების სერიოზული დეფექტები.

 

"ღამე დავჯექი და ამ ქირურგს მივწერე უზარმაზარი მეილი, თუ რამე არის შესაძლებელი რომ გაკეთდეს თანამედროვე მედიცინაში, თუ შეიძლება, ვინმე კიდე ჩავრთოთ. მივწერე, რომ ის დასახიჩრება, რომელიც უნდა მივიღოთ იქნება ძალიან მძიმე და ნიშნავს, რომ რაც რამე მიკეთებია ყველაფერი გაჩერდება...

 

დილის 5 საათზე გავუგზავნე, 1 საათი ვწერდი და მიპასუხა 15 წუთში. მითხრა, რომ ყველაფერი ესმის, დაამატეს სპეციალისტების რამდენიმე ბრიგადა, რომლებიც ამოწმებენ, უჯრედი რამდენად ჯანმრთელია რომ არ მოჭრან იმაზე მეტი, ვიდრე საჭიროა.

 

ზოგჯერ, განსაკუთრებით, როცა ხანგრძლივი გადაცემა მიმყავს და სწრაფად არის აზრი ჩამოსაყალიბებელი, პირის აპარატი არ მომყვება და არის არაბუნებრივი პაუზები. ვნახე, ამაზე ქილიკი და დაცინვები იყო, მაგრამ ეს არის ერთადერთი და არაფერი საწუწუნო არ მაქვს," - აღნიშნავს ირაკლი იმნაიშვილი "ფარულ კონვერტში".

 

 

წყარო : wyaro
big_banner
არქივი