იცხაკ ჰერცოგი დღეს ისრაელის მე-11 პრეზიდენტის მოვალეობების შესრულებას შეუდგება.
ინაუგურაციის ცერემონია ისრაელის პარლამენტში, ქნესეთში გაიმართება. იცხაკ ჰერცოგი ფიცს 107 წლის საოჯახო ბიბლიაზე დადებს, რომელიც თავის დროს მამამისმა, ისრაელის მე-6 პრეზიდენტმა ხაიმ ჰერცოგმა ინაუგურაციისას გამოიყენა.
ფიცის დადების შემდეგ, ახალი პრეზიდენტი სიტყვით მიმართავს ქნესეთს. თავის გამოსვლაში იცხაკ ჰერცოგი ისაუბრებს ისრაელის საზოგადოებაში არსებულ განხეთქილებებსა და პოლარიზაციაზე და ისრაელის დემოკრატიის შესანარჩუნებლად საჭირო ინსტრუმენტებზე.
2 ივნისს ისრაელის პარლამენტმა ქვეყნის მე-11 პრეზიდენტად იცხაკ ჰერცოგი აირჩია. იცხაკ ჰერცოგს ხმა 87 პარლამენტარმა მისცა. 2013-2017 წლებში იგი ლეიბორისტული პარტიის ლიდერი იყო.
აღსანიშნავია, რომ იცხაკ ჰერცოგის მამა, ხაიმ ჰერცოგი 1983-1993 წლებში ისრაელის მე-6 პრეზიდენტის თანამდებობას იკავებდა.