უნგრეთის საგარეო საქმეთა მინისტრმა, პიტერ სიიარტომ განაცხადა, რომ აშშ აშკარად ცდილობს უნგრეთს ომის ბანაკისკენ უბიძგოს, თუმცა აღნიშნა, რომ უნგრეთი მშვიდობის მომხრე გლობალურ უმრავლესობას მიეკუთვნება.

პიტერ სიიარტოს თქმით, უნგრეთში აშშ-ის ელჩი, დევიდ პრესმანი ომის პროპაგანდით არის ცნობილი.

აშშ-ის ელჩმა განაცხადა, რომ ომის დაწყებიდან პიტერ სიიარტო ხუთჯერ ეწვია რუსეთს ენერგეტიკის საკითხების განსახილველად, თუმცა არც ერთხელ არ დამჯდარა სასაუბროდ უკრაინის საგარეო საქმეთა მინისტრთან.

„ელჩებს სხვა ქვეყნებში ორმხრივი ურთიერთობების გასაუმჯობესებლად ვაგზავნი და არა იმისთვის, რომ იფიქრონ, რომ ადგილობრივებზე უფრო ჭკვიანები არიან“, - აღნიშნა უნგრეთის საგარეო უწყების ხელმძღვანელმა.

„აშშ-ის ელჩის თქმით, ჩვენ უნდა დავკავდეთ ომის [საკითხით]. ეს არის ომის პროპაგანდა. ჩვენ არ გვინდა ომი. ჩვენ მშვიდობა გვსურს. ჩვენ გვესმის, რომ ამერიკელები ომის პროპაგანდისკენ, ომის ბანაკისკენ გვიბიძგებენ, მაგრამ ჩვენ სამშვიდობო ბანაკს ვეკუთვნით“, - განაცხადა პიტერ სიიარტომ.