CNN: მიჩიგანში ჩინელმა სტუდენტმა არჩევნებზე ხმა უკანონოდ მისცა, თუმცა მისი ბიულეტენი მაინც ჩაითვლება
აშშ-ში 19 წლის ჩინელი სტუდენტი ამერიკის საპრეზიდენტო არჩევნებში უკანონო მონაწილეობის გამო დააკავეს. ინფორმაციას CNN-ი ავრცელებს.
ამერიკული ტელეარხის ცნობით, ჩინელი სტუდენტი, რომელიც მიჩიგანის უნივერსიტეტში სწავლობს, ამერიკის მოქალაქე არ არის, შესაბამისად, მას არჩევნებში მონაწილეობის უფლება არ ჰქონდა.
ინფორმაცია მიჩიგანის გენერალურმა პროკურორმა დაადასტურა მას შემდეგ, რაც „რესპუბლიკურმა“ პარტიამ არჩევნებში უცხოელების მონაწილეობის შესახებ გააკეთა განცხადება.
ჩინელმა სტუდენტმა ხმა კვირას მისცა. არჩევნებში მონაწილეობის მისაღებად მან რეგისტრაცია სტუდენტური ბილეთის წყალობით გაიარა, თუმცა იმავე დღეს ადგილობრივ საარჩევნო კომისიას მიმართა და სთხოვა, რომ მისი ბიულეტენი ამოეღოთ.
ახლა შტატის სამართალდამცველები და ხელისუფლება ცდილობენ დაადგინონ ეს ინდივიდუალური შემთხვევა იყო, თუ ჩინეთის მიერ არჩევნებში ჩარევის მცდელობის ნაწილია.
როგორც ტელეარხი იუწყება, მიუხედავად იმისა, რომ ჩინელმა სტუდენტმა ბრალი აღიარა, მისი ბიულეტენის ყუთიდან ამოღება ვერ მოხერხდება, რადგან არცერთ ბიულეტენს რამე განმასხვავებელი ნიშანი არ აქვს, შესაბამისად ჩინელი სტუდენტის მიერ ჩაგდებული ბიულეტენის იდენტიფიკაცია ვერ მოხდება.
აღსანიშნავია, რომ სტუდენტი ჩინეთიდან ამერიკაში კანონიერი საფუძვლით იმყოფება. თუ მას სასამართლო დამნაშავედ ცნობს, ის აშშ-ის ტერიტორიიდან გაძევებული იქნება.