ევროპის საბჭოს მინისტრთა კომიტეტის სხდომაზე, ევროპის საბჭოში საქართველოს ელჩმა, თამარ ტალიაშვილმა ევროპის საბჭოს ადგილობრივ და რეგიონულ ხელისუფლებათა კონგრესის პრეზიდენტს, ლიინდერ ვერბეეკს სიტყვით მიმართა.

ტალიაშვილმა, მათ შორის, როგორც წარსულში კონგრესის ვიცე-პრეზიდენტმა, ისაუბრა ადგილობრივი და რეგიონული ხელისუფლების მნიშვნელობაზე დეცენტრალიზაციის, დემოკრატიისა და ადგილობრივ დონეზე ადამიანის უფლებათა განმტკიცებისთვის, გლობალური განვითარების ინიციატივების ლოკალურ დონეზე გამყარებისთვის.

ხაზი გაუსვა საქართველოსა და კონგრესს შორის ნაყოფიერ და ეფექტურ თანამშრომლობას. მადლობა გადაუხადა კონგრესის პრეზიდენტს საქართველოში მიმდინარე წარმატებული დეცენტრალიზაციის რეფორმის მხარდაჭერისთვის და განხორციელებული პროექტებისთვის.

საქართველოს ელჩი მიესალმა კონგრესის მიერ ღიად და ხმამაღლა რუსეთის მიერ საქართველოს რეგიონების ოკუპაციის დაგმობასა და საქართველოს ტერიტორიული მთლიანობისა და სუვერენიტეტის მხარდაჭერას საერთაშორისოდ აღიარებულ საზღვრებში. მიესალმა კონგრესის მიერ უკრაინისთვის აღმოჩენილ დახმარებას, უკრაინაში რუსეთის აგრესიის კონტექსტში.

ტალიაშვილმა ასევე ხაზგასმით აღნიშნა, რომ ევროპის საბჭოს მინისტრთა კომიტეტის თავმჯდომარეობის დროს, საქართველოს ერთ-ერთ პრიორიტეტს გარემოს დაცვა და ადამიანის უფლებები წარმოადგენდა და მიესალმა, კონგრესის მიერ აღნიშნულ საკითხზე მაღალ დონეზე მუშაობას.

ტალიაშვილმა თავის გამოსვლაში ევროპის საბჭოს ისტორიულ მეოთხე სამიტის მოსამზადებელ პროცესში კონგრესის ჩართულობასა და სამიტის დეკლარაციაში საქართველოს ტერიტორიული მთლიანობისა და სუვერენიტეტის მხარდაჭერის მნიშვნელობაზე ისაუბრა.