საქართველოს დედაქალაქი 10 ქვეყნის 100 წარმომადგენელს მასპინძლობს. საერთაშორისო კონფერენციას - “ციფრული ციებ-ცხელება თბილისში“ სფეროს ენთუზიასტები უკრაინიდან, ბელარუსიდან, აზერბაიჯანიდან, სომხეთიდან, რუსეთიდან, ყაზახეთიდან და სხვა ქვეყნებიდან ესტუმრნენ.

ღონისძიების ფარგლებში ციფრული ინდუსტრიის ლიდერები - ბიზნესმენები, სტარტაპერები, საჯარო მოხელეები, აიტი სპეციალისტები, ინვესტორები საქართველოში ბიზნესის წარმოების კუთხით შექმნილ ვითარებასაც გაეცნობიან და ქართულ ეკონომიკაში საკუთარი წვლილის შეტანის შესაძლებლობებსაც განიხილავენ.

ღონისძიებაზე 40 მომხსენებელი საზოგადოებას ციფრული ტექნოლოგიების სამყაროში არსებული ვითარებისა და ტრენდების შესახებ საკუთარ მოსაზრებას გაუზიარებს. კრიპტობირჟების დამფუძნებლები ყურადღებას კრაუდფანდინგის ტრენდებსა და  IEO/STO-ს მომავალზე გაამახვილებენ. მონაწილეები ახალ პროექტებსა და ციფრულ პროდუქტებსაც წარმოადგენენ და საქართველოში მათი დანერგვისა და რეალიზაციის შესაძლებლობებზე იმსჯელებენ. ცალკე ბლოკი მიეძღვნება გეიმინგს ბლოკჩეინზე. ქართველი დეველოპერები კი ყურადღებას უძრავი ქონების  კრიპტოვალუტაში გაყიდვის ტენდენციაზე გაამახვილებენ.

პროექტის ფარგლებში შედგება „მრგვალი მაგიდა“, რომლის მიმდინარეობისას განიხილება თემები:

1. ბლოკჩეინი უმაღლეს სასწავლებლებში (წინადადებები, პროგრამები)

2. ჭკვიანი ქალაქი - ბლოკჩეინის ეტაპობრივი დანერგვის სისტემა

3. აპრობირებული პროექტები, უსაფრთხოება და მონაცემთა ბაზები

4. თანამედროვე კაპიტალის ეკოლოგია, საერთაშორისო ეკონომიკური ურთიერთობების გაჯანსაღების სამარშრუტო რუქები

5. ციფრული ეკონომიკა, როგორც სამოქალაქო დიპლომატიის აქსელერატორი

6. საქართველო, როგორც საგანმანათლებლო კვირეულის „განათლების ფორუმის“ ორგანიზატორი

ღონისძიების არაფორმალური ნაწილი საქართველოს ღირშესანიშნაობების გაცნობით, მათ შორის,  ძველი დედაქალაქის - მცხეთის მონახულებით გაგრძელდება და ბუნების წიაღში, ახალი პარტნიორებისა და მეგობრების გარემოცვაში, საზაფხულო დასვენებით და ქართული ტრადიციული სუფრით დაგვირგვინდება.

ღონისძიების არაფორმალური ნაწილი საქართველოს ღირშესანიშნაობების გაცნობით, მათ შორის,  ძველი დედაქალაქის - მცხეთის მონახულებით გაგრძელდება და ბუნების წიაღში, ახალი პარტნიორებისა და მეგობრების გარემოცვაში, საზაფხულო დასვენებით და ქართული ტრადიციული სუფრით დაგვირგვინდება.

Digital Georgia-ს იდეური სულისჩამდგმელის, ევგენი რომანენკოს თქმით, ამ ღონისძიებით ციფრული საქართველო ახალ ამბასადორებს შეიძენს.

„ეს არის ქვეყანა  სამიათასწლოვანი ისტორიით, შემოქმედის მიერ კურთხეული, ორ ზღვას შუა აღმოცენებული კაცობრიობის აკვანი ...  აღსანიშნავია ის ფაქტი, რომ საქართველო Doing Business 2019-ის ტოპათეულშია შესული და ტურისტებისთვის მიმზიდველ ქვეყნად არის აღიარებული. უცხოელებს ხიბლავთ ქართული სტუმართმოყვარეობა, აქაური ლანდშაფტი, პირობები, რომელიც ქვეყანაშია შექმნილი, თუნდაც, ბიზნესის წარმოების კუთხით.  ჩვენი ამოცანაა, მაქსიმალურად მეტი პროფესიონალი, მეტი ნოვატორი ჩამოვიყვანოთ საქართველოში, ორგანიზება გავუწიოთ შეხვედრებს მეტი სასარგებლო იდეისა და ქვეყნის ეკონომიკისთვის მნიშვნელოვანი პროექტების რეალიზაციის მიზნით.  ვიმედოვნებთ, რომ „ციფრული ციებ-ცხელება თბილისში“ აიტი ტექნოლოგიების მიმართულებით საქართველოში ყოველწლიურ საზაფხულო ფესტივალად იქცევა“, - განაცხადა ევგენი რომანენკომ.

ღონისძიების ორგანიზატორები არიან - Digital Georgia (საერთაშორისო ინიციატივა საქართველოში ციფრული ტექნოლოგიების განვითარებისთვის მიმართულებით) და Crypto Tour Georgia (ციფრული ბიზნესტურიზმის ოფიციალური ტუროპერატორი საქართველოში).